لە شەڕی ئەمڕۆی شنگال زیاتر لە 16 ئۆتۆمبێلی بۆمبڕێژكراوی داعش لەكاتی هێۆشكردن بۆ پێشمەرگە لەلایەن فڕۆكە جەنگییەكانی هاوپەیمانان و پێشمەرگە تەقێندراونەتەوە.

داعش لە زۆربەی شەڕەكانی پێشوو بەرامبەر پێشمەرگە، سوپای عێراق، یەپەگە و سوپای سووریا پشتی بە هێرشی خۆكوژی و ئۆتۆمبێلی بۆمبڕێژكراو دەبەست، بەڵام لە شەڕی ئەمڕۆی شنگال ئەو پیلانەی داعش سەركەوتوو نەبوو، بەجۆرێك تەنها یەك خۆكوژی داعش نەیتوانی بگاتە شوێنی مەبەست و زیان لە پێشمەرگە بدات.


لە سەربەیانی ئەمڕۆ پێنجشەممەوە هێرشی پێشمەرگە بە بەشداری 7 هەزار و 500 پێشمەرگە، لە سێ قۆڵەوە بە سەرپەرشتی راستەوخۆی مەسعود بارزانی، سەرۆكی هەرێمی كوردستان و فەرماندەی گشتیی هێزە چەكدارەكان دەستیپێكردووە و تاوەكو ئێستا بەردەوامە.

لە دەوروبەری ناوچەی شنگال رایگەیاند کە فڕۆکەکانی هاوپەیمانان و هێزەکانی پێشمەرگە نزیکەی 15 ئۆتۆمبێلیان تەقاندوونەتەوە و لە هەموو لایەکی شنگال بە هێزەکانی پێشمەرگە دەورەدراوە.

هاوكات زەعیم عەلی، فەرماندەی پێشمەرگە لە شنگال لەبارەی شەڕەكە گوتی " بەرلەوەی دەست بە هێرش بکەین، زانیاری وامان پێدرابوو کە داعش هێزێکی زۆری رەوانەی شنگال کردووە و خەڵکی بیانیان لەگەڵە، بەڵام نەیاتوانی خۆیان رابگرن".

سەبارەت بە ئۆتۆمبێلە بۆمبڕێژكراوەكان زەعیم عەلی گوتی لەڕێگەی فڕۆکە جەنگییەکانی هاوپەیمانانەوە 8 ئۆتۆمبێلی داعش تێکشکێندراون، هێزەكانی پێشمەرگەش 8 ئۆتۆمبێلیان لە چەند شوێنێك بە چەكی میلان تەقاندوونەتەوە".

نێوبراو ئاماژەی بە هەڵاتنی چەکدارانی داعش کرد و گوتی" چەکدارانی داعش بەرگرییان زۆر لاوازبووە، ئێمە بینیمان کە چۆن چەکدارانی داعش هەڵدەهاتن ".









رووداو