به‌ڕێوه‌به‌ری كه‌شناسی و بومه‌له‌رزه‌زانی‌ سلێمانی رایده‌گه‌یه‌نێت، شه‌پۆلێكی‌ باران بارین له‌ كۆتایی‌ ئه‌م هه‌فته‌یه‌وه‌ تا سه‌ره‌تای‌ هه‌فته‌ی‌ داهاتوو روو له‌ هه‌رێمی‌ كوردستان ده‌كات، ده‌شڵێت، له‌ هه‌ندێك ناوچه‌ ئه‌گه‌ری روودانی‌ لافاو هه‌یه‌.

دارا حه‌سه‌ن، به‌ڕێوه‌به‌ری كه‌شناسی و بومه‌له‌رزه‌زانی‌ سلێمانی به‌ خه‌ندانی راگه‌یاند: "دوو شه‌پۆلی پاڵه‌په‌ستۆی نزیك له‌ ده‌ریای ناوه‌ڕاست و ده‌ریای سوره‌وه‌ روو له‌ ناوچه‌كانی هه‌رێم ده‌كات و ده‌بێته‌ هۆی دابارینی باران، له‌ ناوچه‌ شاخاوییه‌كانیش ئه‌گه‌ری بارینی ته‌رزه‌ هه‌یه‌".

ئاماژه‌ی‌ به‌وه‌شكرد: "به‌پێی پێشبینییه‌كان هه‌وره‌ بروسكه‌ رووده‌دات و ماوه‌ی بینین كه‌مده‌بێته‌وه‌و له‌ هه‌ندێك شوێنیش ئه‌گه‌ری روودانی لافاو هه‌یه‌".

وتیشی‌: "شه‌پۆلی باران بارینه‌كه‌ تاكۆتایی ئه‌م هه‌فته‌یه‌و سه‌ره‌تای هه‌فته‌ی داهاتوو به‌رده‌وام ده‌بێت و له‌ هه‌رێم رێژه‌یه‌كی زۆر باران ده‌بارێت".