هێمن هەورامی: گۆڕان بە سیاسەتە هەڵەكانی ئاڕاستەی سیاسیی كوردستانی تێكدابوو ئێمە ئێستا سەرقاڵی گفتوگۆین بۆ ڕاستكردنەوەی
ئەندامی ئەنجوومەنی سەرکردایەتیی پارتیی دیموکراتی کوردستان (هێمن هەورامی) لە دیمانەیەكیدا لەگەڵ ئاژانسی ئانادۆڵو، پرسە سیاسییەکانی پەیوەندییدار بە هەرێمی کوردستان تاوتوو دەکات و لە پەیوەندی لەگەڵ ئاڵۆزییەکانی ئەم دواییە لە نێوانی پارتییەکەی و تاقمهكهی (نهوشیروان)دا دەڵێ: "هۆكاری سەرەكیی ئەو تەنگەژەیە بزووتنەوەی گۆڕانە، ئەویش بەهۆی پابەندنەبوونی بەو رێككەوتنامەیەی كە لەگەڵ پارتیی دیموكراتی كوردستاندا كردبووی بۆ وەرگرتنی پۆستی سەرۆكی پەرلەمان و وەزیرەكانیان".
(هێمن هەورامی) لەو دیمانەیەدا جەخت لەوە دەکاتەوە کە، "پۆستی سەرۆكی پەرلەمان لە لایەن تاقمهكهی (نهوشیروان) و بەتایبەتیش لەلایەن (یووسف محەممەد)ەوە بەكار هێنرا بۆ پەكخستنی پەرلەمان، بۆ پەكخستنی هاوسەنگی و سازان، ئەو سازانەی كە (یووسف محەممەد)ی پێ بوو بە سەرۆكی پەرلەمان".
(هەورامی) هەڵوێستی فەرمیی پارتییەكەی سەبارەت بە سەرۆكی پەرلەمان و وەزیرەكانی تاقمهكهی (نهوشیروان) روون كردەوە و گوتی: "لەبەر ئەوەی گۆڕان پێشێلی رێككەوتنەكەی كرد، ئێمە رێككەوتنەكەمان هەڵوەشاندەوە و، (یووسف)یش لەلای ئێمە سەرۆكی پەرلەمان نییە و، بە وەزیرەكانیشان گوتراوە كە نەچنە دەوام".
(هێمن هەورامی) ئاماژەیشی دا، كە ئاراستەی سیاسی لە هەرێمی كوردستان دا بەهۆی سیاسەتە هەڵەكانی تاقمهكهی (نهوشیروان)ەوە رێڕەوی راستەقینەی خۆیان ون كردەوە و گوتی: "ئێمە ئێستا سەرقاڵی گفتوگۆین لەگەڵ یەكێتیی نیشتمانیی كوردستان و لایەنەكانی دیكە بۆ ئەوەی ئاراستەی سیاسی لە كوردستان راست بكەینەوە، چونكە گۆڕان ئاراستەی سیاسی لە كوردستان دا بەلاڕێدا بردووە".
بەگوتەی (هێمن هەورامی)، پارتی نیگەرانە لە سیاسەتە دوو ئاراستەكەی تاقمهكهی (نهوشیروان) لەناو حكوومەتدا و دەڵێت: "ناكرێت گۆڕان لەناو حكوومەتدا بن، بەڵام لە بارەگاكانیانەوە پلان دابڕێژن و سەرپەرشتیی كۆمەڵێك كەس بكەن كە كاری توندوتیژی بەرانبەر بە پارتیی دیموكراتی كوردستان بكەن و، خۆیان وەكو ئۆپۆزسیۆنێكیش بەرانبەر بە حكوومەت پێشان بدەن، بۆیە دەبێت ئەوانیش وەكو ئێمە بەرپرسیارێتی هەڵبگرن، ئەگەر ناتوانن ئەو بەرپرسیارێتییە لەگەڵ ئێمە هەڵگرن نابێت لەگەڵ ئێمەدا بن".
ئهو ئهندامهی سهركردایهتیی پارتی، روونیشی كردەوە، كە لە كابینەی هەشتەمی حكوومەتی هەرێمی كوردستان دا زۆرینەی دەسەڵات لای لایەنەكانی دیكەیە نەك پارتیی دیموكراتی كوردستان و، دەڵێت: "گۆڕان بەشێكە لە حكوومەت، ئێمە لە كۆی 23 وەزارەت تەنیا 5 وەزارەتمان هەیە، بەڵام گۆڕان و لایەنەكانی دیكە 16 وەزارەتیان هەیە، بۆیە زۆرینەی دەسەڵات ئەوانن".
سەبارەت بە توندوتیژی و گێرێشێوێنییەكانی ئەم دواییەی پارێزگای سلێمانی، (هێمن هەورامی) دەڵێت: "ئەو كارانەی كە تاقمهكهی (نهوشیروان) دەیكات لە رێگەی توندوتیژییەوە، پارتی تێیدا بووەتە قوربانیی سەرەكی، چونكە دوو كادرمان شەهید بوون، شەش بارەگامان سووتاون، 50 كادری ئێمە بریندارن، بۆیە تاقمهكهی (نهوشیروان) بەو كارەی ستەمی لە پارتی كردووە لە پارێزگای سلێمانی".
ئەو ئەندامەی سەرکردایەتیی پارتیی دیموکراتی کوردستان هەروەها ئاماژەش بەوەدەكات كە، تاقمهكهی (نهوشیروان) كێشەی لە پارێزگای سلێمانی لەبەر ئەوە درووست كردووە، دەیەوێت ئەو توندوتیژیانەی بێنێتە هەولێر و پارتی تووشی كاردانەوە بكات و، دۆخی كوردستان تێك بچێت بۆ ئەوەی ئەوان بڵێن ئەوە پارتی بوو دۆخی كوردستانی تێكدا.
"قەیرانی ئابووریی هەرێمی کوردستان پەیوەندی بە سەرۆكایەتیی هەرێمی كوردستانەوە نییە"
دەربارەی قەیرانی ئابووری لە هەرێمی کوردستان و نیگەرانییەکانی خەڵک، (هێمن هەورامی) دەڵێت: "هەموو كەس دەزانێت كە دۆخی ئابووریی هەرێمی كوردستان پەیوەندی بە سەرۆكایەتیی هەرێمی كوردستانەوە نییە و، بوودجە بە بڕیاری (نووری مالیكی) بڕاوە و (عەبادی)یش بەردەوامە لەسەر بڕینی و، نرخی نەوتیش دابەزیوە، دوو ملیۆن ئاوارە و پەنابەر لە كوردستاندا هەن، شەڕی داعش هەیە، بۆیە ئەوانەن كە دۆخی ئابووریی هەرێمی كوردستانیان تێكداوە".
سەبارەت بە تێڕوانینی وڵاتانی دەرەوە لەسەر ئەو بارودۆخەی لە هەرێمی كوردستاندا هاتووهته ئاراوه، (هێمن هەورامی) دەڵێت: "ئێمە لە رۆژی یەكەمی پەلاماردانی بارەگاكانمانهوه، پەیوەندیمان بە هەموو كۆنسووڵەكانەوە هەبووە لە هەولێر، بەردەوام زانیاریمان پێداون، بەڵگەمان پێداون لەسەر ئەوەی كە چۆن گۆڕان توندوتیژی بەكار دەهێنێت".
"کۆنسووڵی وڵاتان پشتیوانی سەقامگیریی كوردستانن"
ئهو دەڵێت: "هەموو ئەو وڵاتانەی كۆنسووڵگەرییان لە هەولێر هەیە، بۆ ئێمەیان تەئكید كردەوە كە، پشتیوانی خەڵكی كوردستانن، پشتیوانی سەقامگیریی كوردستانن، پشتیوانی بەردەوامیی پرۆسەی سیاسیی كوردستانن، پشتیوانی كوردستانن لە شەڕی تیرۆریستی داعش، چونكە هەڕەشەی گەورەتر لەسەر كوردستان هەیە".
(هێمن هەورامی) هەروەها دەشڵێت: "ئەو وڵاتانە ئامۆژگاریی هەموولایەكیان كردووە كە توندوتیژی بەرانبەر بە یەك بەكار نەهێنن و بگەڕێنەوە بۆ دیالۆگ، چونكە ئەوان هەرێمی كوردستان بە هاوپەیمانی تەواو لە شەڕی دژی داعش دەزانن و، پێیان خۆشە كە هاوپەیمانەكەیان بەهێز بێت نەك بەهۆی ئەمەوە لاواز بێت".
"تاقمهكهی گۆڕان دەیویست ئاژاوەكە بێنێتە هەولێر"
رۆژی دووشەممەی رابردوو لە بازگەی (پردێ)ی نزیك شاری هەولێر ئاسایشی ئەو بازگەیە رێگەی نەدا، (یووسف محەممەد) بچێتە ناو شاری هەولێر و بەشداری كۆبووەوەی پەرلەمان بكات، سەبارەت بەو پرسەش (هێمن هەورامی) دەڵێت "لە هەنگاوی یەكەمیدا بزووتنەوەی گۆڕان دەیویست ئاژاوەكە بێنێتە هەولێر، پاشان لە سلێمانیش بەردەوامی پێ بدات، بۆیە بە وەزیرەكان وتراوە نەگەڕینەوە دەوام و، سەرۆكی پەرلەمانیش كە خۆی بەشێكە لە درووستكردنی ئەو كێشانە ئەویش بە تێكدانی تەوافوق، داوامان لێ كردووە نەیەتەوە هەولێر، بۆ ئەوەی ئەو ئاژاوەیە نەیەتە هەولێر و لەگەڵ ئەوەیشدا ئەو ئاژاوەیە لە سلێمانییش نەمێنێت".
وهك (هێمن هەورامی) گوتی، لە یەك دوو رۆژی رابردوودا، هەست دەكەن جۆرێك لە ئارامیی زیاتر لە سلێمانی و ناوچەكانی دیكەش هەیە و دەڵێت "هەموو بارەگاكانی خۆمان لە سلێمانی رادەستی پۆلیس كردووە، بۆ ئەوەی بیانوو نەدەینە دەست ئاژاوە و تێكدەران پشێویی زیاتر بنێنەوە".
ئەو هاوكات رەخنە لە تاقمهكهی (نهوشیروان) دەگرێت لەوەی، كە نەیتوانیوە هاوكار بێت لەگەڵ پارتی و لایەنەكانی دیكە بۆ ئەوەی كێشەكانی هەرێم چارەسەر بكرێن و، گوتیشی: "تاقمهكهی (نهوشیروان) كە خاوەنی وەزیری دارایی و سەرۆكی پەرلەمان بوون، دەبوایە لەگەڵ ئێمە بەشدار بن لە چۆنیەتیی چارەسەركردنی كێشەكان، ئەوان هاتن لە 23ی حوزەیرانی رابردوو تەوافوقیان تێك دا و، جەختیان لەسەر ئەوە كردەوە كە، كۆبوونەوەی 19ی مانگی ئابی رابردوو ساز بكرێت و، كۆبوونەوە پێنجقۆڵییەكانیش هەر گۆڕان پەكی خست، بۆیە تاقمهكهی گۆڕان بەم جۆرە سیاسەتكردنەی ئیستای، كێشەیە بۆ كۆی سیستەمی سیاسی لە هەرێمی كوردستاندا".
(هێمن هەورامی) هیواخوازیشە كە تاقمهكهی (نهوشیروان) بە سیاسەتی خۆیدا بچێتەوە لە بەشداریكردنی حكوومەتدا و دەڵێت: "ئێمە هیوادارین سەركردە عاقڵەكانی تاقمهكهی (نهوشیروان) لە پیلانگێڕیی سەركردە رقاوییەكانی خۆیان رزگار بكەن و، بگەڕێنەوە ناو پرۆسەی سیاسی".
لە پەیوەندی لەگەڵ ئەو هەوڵانەی کە بە مەبەستی کۆبوونەوەی پەرلەمانی کوردستان کە لەپاش رێگە نەدان بە سەرۆكی پەرلەمانی كوردستان بڕیارە لە سلێمانی بکرێ، بەڵام هەتا ئێستا جێبەجێ نەکراوە، (هێمن هەورامی) دەڵێت: "بەپێی پەیڕەوی نێوخۆی پەرلەمان، شوێنی كۆبوونەوەی پەرلەمان هەولێر و ناو باڵاخانەی پەرلەمانی كوردستانە، ئەگەر بڕیار بدرێت كە كۆبوونەوەكە لە شوێنێكی دیكە بكرێت، دەبێت لە كۆبوونەوەیەكی پێشووتردا پەرلەمان بڕیاری لێ بدات، پاشان دەتوانن لەو شوێنە كۆ ببنەوە، وەكو ئەوەی كە ساڵی رابردوودا كرا كە پەرلەمان لە هەڵەبجە كۆ بوویەوە".
"ناکۆکییەکان دوای ساڵی 2017 لە ناو پەرلەمان بە دەنگدان یەكلایی بكرێتەوە"
(هێمن هەورامی) جەخت لەسەر بێمتمانەیی حزبەكەی لەسەر سەرۆكی پەرلەمانی كوردستان دەكاتەوە و دەڵێت: "ئێمە ئێستا (یووسف محەممەد) بە سەرۆكی پەرلەمانی كوردستان نازانین، (یووسف) لە رێگەی تێكدانی تەوافوقەوە پەرلەمانی ئیفلیج كرد، چونكە ئەو پابەند نەبوو بە بڕیاری ئەنجوومەنی شوورا، دژی تەوافوق رێككەوتنەكەی كرد، رێژەیان تێكدا، نەیانتوانی بەدیلێكی باش بۆ پرۆژەی دەستوور بدۆزنەوە، بۆیە ئەوان خۆیان وایان كرد كە بارودۆخەكە بەو شێوەیە بگات".
دەیشڵێت "پەرلەمان سێ ئەركی هەیە، ئەركی یەكەمیان دەركردنی یاسایە، ئەركی دووەمیان ئەركی چاودێریكردنی حكوومەت، ئەركی سێیەمیان شەرعیەت بەخشینە، پەرلەمانی كوردستان ئێستا هەر سێ دەسەڵاتەكەی خۆی ئیفلیج كردووە، بۆیە پەرلەمانی كوردستان ناتوانێت لە سلێمانی كۆ ببێتەوە".
سەبارەت بە پرسی سەرۆكایەتیی هەرێمش (هێمن هەورامی) دەڵێت: "بەداخەوە تاقمهكهی گۆڕان، بە دیاریكراویش (یووسف محەممەد) و رێكخەری گشتییان، زۆر هەوڵیان دا كە ئەجیندایەك لە دەرەوەی سازان لەسەر پارتی بسەپێنن، بەوەی كە پێداگرییان لەسەر ئەوە دەكرد كە دەبێت سەرۆكی هەرێم دەسەڵاتێكی تەشریفاتی هەبێت و لەلایەن پەرلەمانەوە هەڵبژێردرێت، و لە سەرەتاوە تاكۆتایش لەسەر ئەو سیاسەتەی خۆیان سوور بوون".
هەروەها دەڵێت "لە سەرەتاوە تاوەكو ئێستا پارتی كراوە بووە بۆ هەموو سیناریۆیەك، بۆ هەموو ئەگەرێك و، پارتی زیاد لە رێكارێكی دایە ئەو چوار لایەنە، ئێمە دەمانەوێت سەرۆكی هەرێمی كوردستان بە شێوەیەكی راستەوخۆ لەلایەن گەلەوە هەڵبژێردرێت و ئامادەین كە قسە لەسەر دەسەڵاتەكانی بكرێت و رێك بخرێنەوە، ئەگەر لەسەر ئەمە رازی نەبوون، لەگەڵ ئەوەین كە ریفراندۆم بكرێت و گەل بڕیار بدات بۆ ئەوەی كە سەرۆك لەلایەن گەلەوە هەڵبژیردرێت یان لەلایەن پەرلەمانەوە، ئەگەر ئەوەش نەكرا، ئەوە ئەو بابەتە بە جێ بهێڵین بۆ لیژنە 21 كەسییەكەی دەستوور، ئەگەر بەوەش رازی نەبوون، ئێمە ئەم بابەتە لە خولی ئایندەی پەرلەمان دا و لە دوای ساڵی 2017 لە ناو پەرلەمان بە دەنگدان یەكلایی بكرێتەوە، بەڵام بەمەرجێك لە ئێستاوە ئەم بابەتە بكرێتە كەمپەینی هەڵبژاردن كە بڵێن پەرلەمانی ئایندە ئەم بابەتە یەكلایی دەكاتەوە بۆ ئەوەی جەماوەر دەنگ بەو لایەنە بدات كە سەرۆك بەداخوازی خۆی هەڵبژێرێت".
"نەوشیروان مستەفا كە لە یەكێتیی جیا بوویەوە، لەسەر رێككەوتنی ستراتیژیی یەكێتی بوو لەگەڵ پارتی"
ئەندامەکەی سەرکردایەتیی پارتی دیموکرات رەخنە لە تاقمهكهی گۆڕان دەگرێت لەسەر ئەوەی، كە ئەوان دەیانەوێت پرسی سەرۆكایەتیی هەرێم بە ویستی ئەوان یەكلایی بێتەوە و دەڵێت: "بەداخەوە پێداگریی تاقمهكهی گۆڕان لەسەر ئەوەی كە دەبێت سەرۆكی هەرێم لە پەرلەمانەوە هەڵبژێردرێت و ئەگەر لەناو گەلیش هەڵبژێرێت دەبێت دەسەڵاتی نەبێت، ئەوە پێداگریی گۆڕان بوو كە كۆبوونەوەی پێنجقۆڵی دوای نۆ كۆبوونەوە ئێمە گەڕاینەوە خاڵی یەكەم".
گوتیشی: "بزووتنەوەی گۆڕان دونیابینییەكی تایبەتی سیاسی هەیە، بەڵام خودی (نەوشیروان مستەفا) لەسەر بنەمای رق مامەڵە لەگەڵ پرسی سەرۆكایەتیی هەرێمدا دەكات".
(هێمن هەورامی) دەشڵێت "ئەوان باوەڕیان بەوە نییە و ناتوانن كە كاندیان هەبێت و لە هەڵبژاردنەكاندا متمانەی گەلی كوردستان بە دەست بێنن و، متمانەیان نییە كە خەڵكی كوردستان دەنگیان پێ بدات. ئەوان پێیان وایە كە لە هەر هەڵبژاردنێكی راستەوخۆدا كاندیدی پارتی لەناو گەل متمانەی پێ دەدرێت بۆیە دژی ئەوەن كە سەرۆكی هەرێم لەلایەن گەلەوە هەڵبژێردرێت و باوەڕیان بەوە نییە كە كاندیدیان هەبێت و دەزانن لە هەر هەڵبژادنێكی راستەوخۆ كە لەلایەن گەلەوە بێت، تاقمهكهی گۆڕان هەمیشە بەرانبەر پارتی دۆڕاو دەبێت".
لە كاتی درووست بوونی هەر قەیرانێك لە هەرێمی كوردستان، هاووڵاتیانی هەرێم ترسیان لەوە هەیە، كە جارێكی دیكە هەرێمی كوردستان بۆ دوو ئیدارەیی دابەش بكرێتەوە و زۆرجاریش لە راگەیاندنەكانەوە باس لەو پرسە دەكرێت. لەو بارەیەوە (هێمن هەورامی) گوتی: "پێمان وایە ئەوە سیاسەتێكی هەڵەیە، كوردستان هەرێمێكی جیۆگرافیی یەكگرتووە، راستە لامەركەزی ئیدارییە، دەسەڵاتی پارێزگارەكان دەسەڵاتێكی تاڕادەیەك لامەركەزییە، بەڵام ئەوەی كە هەوڵێك هەبێت كە كوردستان پارچە بكات و بیكاتەوە دوو ئیدارە و دوو سیستەم و دوو سەرچاوەی ئابووری هەبێت، ئەمە دژی خواستەكانی خەڵكی كوردستانە، دژی ئاسایشی نەتەوەیی كوردستانە".
نیگەرانییەکان لە پەرەسەندنی ناکۆکییەکان و داهاتووی هەرێم
(هێمن هەورامی) هەوەرها دەڵێت "پارتی بە هەموو شێوەیەك دووئیدارەیی رەت دەكاتەوە، پارتی و جەنابی (سەرۆك بارزانی) ساڵی 2004 دژی فیدراڵیی پارێزگاكان وەستانەوە بەوەی كە عێراق بكرێتە 18 پارێزگای فیدراڵ، دژی (بریمەر) و ئەنجوومەنی حكوومییش وەستایەوە و رێگەی نەدا، كوردستان بكرێتە سێ پارێزگا لە چوارچێوەی فیدراڵیەتدا، بۆیە پارتی ئێستایش رێگە نادات كوردستان بەرەو دوو ئیدارەیی بگەرێتەوە".
(هێمن هەورامی) پێی وایە كە لایەنەكانی دیكەی كوردستانیش لەگەڵ دووئیدارەیی نین و دەڵێت "نەك هەر پارتی بەڵكو یەكێتییش رێگە نادات، پێمان وایە یەكگرتوویش رێگە نادات، پێمان وایە كە كۆمەڵیش رێگە نادات، و پێمان وایە كە خەڵكێكی دڵسۆزیش لەناو بزووتنەوەی گۆڕان هەیە كە نایەوێت هەرێمی كوردستان بۆ دوو ئیدارەیی بگەرێتەوە".
سەبارەت بە دیتی وڵاتانی دیكە لەسەر درووستبوونی دووئیدارەیی لە هەرێمی كوردستان، (هێمن هەورامی) دەڵێت "ئەمڕۆ كۆبوونەوەم هەبووە لەگەڵ كۆنسووڵی ئەمەریكا لە هەولێر، بەڵام تاكو ئێستا ئەم بابەتە باس نەكراوە، چونكە هیچ لایەك بە فەرمی داوای نەكردووە كە كوردستان بەرەو دوو ئیدارەیی بڕوات، بڕوا ناكەم كە هیچ لایەنێك جورئەتی ئەوەی هەبێت كە كوردستان پارچە پارچە بكات، چونكە پارچە پارچەكردنی كوردستان واتە پاشەكشەپێكردنی دۆزی كورد بۆ چەند ساڵی ئایندە".
(هێمن هەورامی) باس لە چەند سیناریۆیەكیش دەكات بۆ بەرێوەبردنی هەرێمی كوردستان لە پاش دوورخستنەوەی گۆڕان لە پرۆسەی بەڕێوەبردنی هەرێم و، دەڵێت "هەڵبژاردنی پێشوەخت یەكێك لە سیناریۆكانە، لەگەڵ لایەنەكانی دیكە لە گفتوگۆداین، لەگەڵ یەكێتی گفتوگۆ دەكەین و، یەكێتی و لایەنەكانی دیكەیش گفتوگۆیان كردووە و ئەم گفتوگۆیانەش بەردەوام دەبن، كە چۆن پرۆسەی سیاسی لە هەرێمی كوردستان راست بكەینەوە، چونكە پرۆسەی سیاسی لە هەرێمی كوردستان گۆڕان و سەرۆكی پەرلەمان بە لارێیاندا برد و سازانیان تێك دا".
دەیشڵێت "چۆن هەوڵ بدەین بگەڕێینەوە بۆ رێككەوتنەكان، ئەمەش بەوە دەكرێت ئەو سێ لایەنەی كە ماون لەناو حكوومەتدا، كە ئایا بەبێ گۆڕان بەردەوام دەبین لەسەر حكوومەت، ئەمە یەكێك لە بژاردەكانی ئێمە، ئەگەر بەردەوام نەبووین یەكێك لە بژاردەكانی دیكەی ئێمە ئەوەیە كە حكوومەتی هەرێم بەپێی ئیستیحقاقی هەڵبژاردن رێك بخەینەوە، بەپێی ئەو هاوپەیمانێتییە تازانەی كە دەكرێت، ئەگەر لەوەیش نەكەوتینە رێككەوتن، زۆر ئاساییە كە پەرلەمانی كوردستان هەڵوەشێتەوە و حكوومەتی هەرێم دەست لە كار بكێشێتەوە و حكوومەتێكی كاربەرێكەر دروست بكرێت و، ماوە بۆ هەڵبژاردنێكی پێشوەختە دابنرێت".
(هێمن هەورامی) هیوایشی خواست كە سیاسەتە هەڵەكانی تاقمهكهی گۆڕان وا نەكات كە پارتی ناچار بكات، بە رێككەوتنەكانی وەرگرتنی پۆستەكانی بەغدایشدا بچێتەوە و، دەڵێت: "بەغدا مەسەلەیەكی نەتەوەییە، ئێمە چەندین جاریش وەكو پارتی داوامان كردووە كە ئەگەر لەنێوخۆی كوردستان كورد كێشە و گرفتی نێوخۆیی هەبێت، با كاریگەری لەسەر ئێمە و بەغدا دانەنێت، ئێمە دەمانەوێت وەكو كوتلەكانی كوردستانی لە چوارچێوەی یەك سیاسەتی یەكگرتوودا مامەڵە لەگەڵ بەغدا بكەین، چونكە لەوێ ناكرێت حزبایەتی بكرێت، لەوێ دەبێت نوێنەرایەتیی گەلی كوردستان بكرێت. لەوێ كۆمەڵێك بابەتی تایبەت بە كوردستان پیشنیاز كراوە، بۆیە دەبێت لە سیاسەتی دەرەوەی هەرێم بۆ مامەڵەكردن لەگەڵ وڵاتانی دەورووبەر بۆ دۆزی كورد لە پارچەكانی دیكەی كوردستان دا، ئەگەر لەنێوخۆی كوردستانیش ناكۆك بین، دەبێت سیاسەتێكی هاوبەشمان هەبێت، بۆیە هیوادارین گۆڕان وامان لێ نەكات كە كاریگەری لەسەر ئەو پرۆسەیە لە بەغدایش دابنێت".
