له‌ دیدارێكى نێوان شێخ جه‌عفه‌ر شێخ مسته‌فا وه‌زیرى پێشمه‌رگه‌ و كۆلۆنێڵ باتله‌ر به‌رپرسى تیمى ئه‌مه‌ریكى له‌ هه‌رێمى كوردستان و شاندێكى یاوه‌رى، وه‌زیرى پێشمه‌رگه‌ په‌یامى وه‌زاره‌تى پێشمه‌رگه‌ى له‌ رێگه‌ى كۆڵۆنێڵ باتله‌ره‌وه‌ نارد بۆ فه‌رمانده‌یى گشتى هێزه‌كانى ئه‌مه‌ریكا له‌ عێراق سه‌باره‌ت به‌و كێشه‌ و گرفتانه‌ى كه‌ له‌ ناوچه‌كانى جه‌له‌ولا و سه‌عدییه‌ و قه‌رته‌په‌و مه‌نده‌لى و مه‌یدان له‌ ئێستادا روو ده‌ده‌ن.

له‌ په‌یامه‌كه‌دا وه‌زیرى پێشمه‌رگه‌ رایگه‌یاند: كه‌ پێویسته‌ هه‌ر چى زووه‌ كوشت و بڕو ده‌ركردنى كورد له‌و ناوچانه‌ رابگیرێت و سوپا و پۆلیسى عێراقى به‌ ئه‌ركى سه‌رشانى خۆیان هه‌ڵبستن، داواشى كرد كه‌ هێزه‌كانى ئه‌مه‌ریكا له‌م باره‌یه‌وه‌ به‌ ئاشكرایى راى خۆیان ده‌رببڕن.

له‌لاى خۆییه‌وه‌ كۆڵۆنێل باتله‌ر به‌ڵێنى دا په‌یامه‌كه‌ وه‌ك خۆى بگه‌یێنێت، به‌ تایبه‌ت ئه‌و داواییه‌ى وه‌زیرى پێشمه‌رگه‌ كه‌ تایبه‌ت بوو به‌ كۆبوونه‌وه‌ى لیژنه‌ى وه‌زارى هاوبه‌ش.