به‌ به‌شداری 296 ئه‌ندام و له‌ژێر دروشمی (له‌پێناو چه‌سپاندنی ئازادی رۆژنامه‌گه‌ری و ده‌سته‌به‌ركردنی ماف و ژیان و گوزه‌رانی باشتر بۆ رۆژنامه‌نووسان)، ئه‌مڕۆ 21-7 كاره‌كانی كۆنگره‌ی سێیه‌می سه‌ندیكای رۆژنامه‌نووسانی كوردستان له‌ شاری هه‌ولێر ده‌ستیپێكرد.
هه‌ریه‌ك له‌ د. كه‌مال كه‌ركوكی سه‌رۆكی په‌رله‌مانی كوردستان و د. كاوه‌ مه‌حمود نوێنه‌ری سه‌رۆكی حكومه‌تی هه‌رێمی كوردستان و نوێنه‌رانی هه‌ردوو سه‌ندیكای رۆژنامه‌نووسانی عیراق و فه‌له‌ستین و ژماره‌یه‌ك له‌ به‌رپرسانی حكومی ئاماده‌ی مه‌راسیمی ده‌ستپێكی كاره‌كانی كۆنگره‌ بوون، كه‌ تێیدا چه‌ندین وته‌ پێشكه‌شكران و تیایاندا جه‌خت له‌سه‌ر پاراستنی ئازادی راده‌ربڕین و پابه‌ندبوون به‌ پێوه‌رو په‌یوه‌ستنامه‌ تایبه‌ته‌كان به‌ كاری رۆژنامه‌وانی كرانه‌وه‌.
هه‌ر له‌میانه‌ی دانیشتنی ده‌ستپێكی كاره‌كانی كۆنگره‌دا 3 كه‌سی دیاری بواری رۆژنامه‌وانی، ئه‌وانیش (د. فائق ئه‌لبه‌تی و جه‌مال خه‌زنه‌دار و عه‌بدوڵڵا زه‌نگه‌نه‌) رێزیان لێنرا.
بڕیاره‌ كاره‌كانی كۆنگره‌ سێ رۆژ بخایه‌نێت و تێیدا نه‌قیب و ئه‌ندامانی ئه‌نجومه‌نی سه‌ندیكاو سه‌رۆكی لقه‌كانی سه‌ندیكای نوێی رۆژنامه‌نووسانی كوردستان هه‌ڵده‌بژێردرێن.