Leşkerên Artêşa Turk ên ku demeke dirêj e li Şirnex û navçeyên Şirnexê peywirdar in, îro bi karwanên wesayîtên leşkerî vegeriyan bajarên Turkiyeyê.


Li Turkiyeyê ev 3 meh in pêvajoya aştî û çareseriyê di navbera PKK û hukûmetê de tê meşandin. Piştî ku di navbera hukûmetê û Rêberê PKK’ê Ebdullah Ocalan de hevdîtin hatin kirin, nexşeyên çareseriyê jî derketin holê. Ji bo ku civakê ji aştiyê re amade bikin pêşî li 7 herêmên Turkiyeyê komîsyonên ji 9 kesan pêk tên weke aqilmend hatin şandin û aqilmendan li her bajar û navçeyê dest bi civînên razîkirina xelkê kir. Niha hemû çav li rê ne ku çekdarên PKK’ê vekişin derveyî sînor. Rêveberê Konseya Bilind a KCK’ê Duran Kalkan, îro bi rojnamevan Rûşen Çakir re aşkera kir ew hêzên xwe ji bo vekişînê amade dikin û vekişîn dê heta 6 mehan encax biqede.

Li gorî rojnameya Radîkalê jî leşkerên Artêşa Turk jî îro ji Şirnex û navçeyên wê vekişan û bi karwanên leşkerî berê xwe dan bajarên Turkiyeyê. Hate ragihandin ku leşkeran bi xwe re cebilxane û çekên giran jî vekişandine.

Lê ev nûçeya Radîkalê hêj ji aliyê payebilindên Artêşa Turkiyeyê ve nehatiye piştrastkirin. Dibe ku ev vekişîna leşkeran karekî bi rêk û pêk a cihguhertinê jî be.