Alîkarê Serokwezîrê Tirkiyê Bulent Arinç, der barê qetilkirina 3 siyasetmedarên kurd ên li Parîsa Fransayê de, got ku “Ev wehşetek e, hêvîdar im ev bûyer me ji rêya me venegerîne.” Wezîrê Parastinê Îsmet Yilmaz jî diyar kir ku divê mirov êşa malbatên PKK’iyan jî fêm bike.

Nerazîbûnên li hemberî qetilkirina 3 siyasetmedarên jin ên kurd, berdewam dikin. Alîkarê Serokwezîrê Tirkiyê Bulent Arinç, bûyerê wekî wehşet binav kir û wiha got: "Kî jî wisa kiribe, ev mirov bi çi tewanbariyan hatibin binavkirin jî, mafê tu kesan tune ku bi vî awayî dawî li jiyana mirov bînin. Wan mirineke wisa tu car heq nekiribûn.”

Wezîrê Parastinê: Êşa van mirovan jî fêm bikin

Wezîrê Parastinê Îsmet Yilmaz jî di Komîsyona Parastina Netewî ya Meclisê de axivî. Yilmaz got ku divê êşa malbatên PKK’iyan jî bê fêmkirin. Yilmaz, anî ziman ku naxwazin tu kesek jî bimre û wiha got: "Yên ku hatine kuştin jî welatiyên vî welatî ne. Divê mirov êşa dayîk û bavên wan jî fêm bike. "

Rudaw