Li Herêma Xweser a Guangşi Cuangê ya li başûrê Çînê ji ber barana zêde lehî rabûn û ji ber van lehiyan 39 kes mirin.

Ajansa Xinhuayê li ser zarê rayedarên herêmî ragihand ku barana zêde bûye sedema lehiyên wêranker.

Li gorî amaran, di lehiyan de 39 kes mirine û hîn çarenivîsa 9 kesên winda ne diyar e.

Hat eşkerekirin ku hinek mirinan ji ber herifîna Bendava Liulanê ya li bajarê Nannîngê rû daye.

Di wê bendavê de qelseş çêbûye û ava wê bi ser bajêr de herikiye.

Bi sedan kes hatin veguhastin

Ji ber metirsiya hilweşîna bendavê û lehiyên ku çend roj in didomin, bi sedan kes ji malên wan hatin veguhastin.

Di dîmenên ku li ser torên civakî hatine belavkirin de tê dîtin ku zeviyên çandiniyê û stûnên telefonan di bin avê de mane.

Her wiha hinek kesan li ser banê xaniyan daxwaza alîkariyê dikir.

 

Rudaw