Du kolberên Kurd ên Rojhilatê Kurdistanê bi teqeya hêzên pasevanên sînorî yên Îranê li ser sînorê Bakurê Kurdistanê hatin kuştin.

Li gor agahiyên ji çavkaniyên xwecihî ve, li ser sînorê navçeya Kela Xwê (Xoy) ku ser bi parêzgeha Urmiyê ve ye û li nêzîkî sînorê Bakurê Kurdistanê, hêzên Îranê gulle berdane hejmarek kolberên Kurd ku ji ber nebûna derfetên kar û neçariya peydakirina debara jiyana xwe, ber bi sînorê Bakurê Kurdistanê ve diçûn.

Bi gotina çavkaniyên xwecihî, bûyera teqekirina li kolberên Kurd, şeva Pêncşemiyê derdora demjimêr 22:00an li navçeya Elend a Xoyê çêbûye.

Di encama teqeya hêzên Îranê de, du kolberên Kurd ên bi navê Muhsin Derwîşzade û Ibrahîm Cordîzec canê xwe ji dest dane.

Li gor agahiyan, herdu kesên ku di wê bûyerê de hatine kuştin, xelkê gundê Kerkûş yê li navçeya Elend a Xoyê ne.

Çavkaniyên xwecihî ragihandine, Muhsin Derwîşzade zewcî ye û zarokekî wî heye.

Roja Yekşemiya vê heftiyê 24ê Gulanê jî li sînorê bajarê Urmiyê, kolberekî Kurd ê bi navê Erselan Ehmedî ji aliyê hêzên Îranê ve hatibû kuştin û du kolberên din ên bi navê Toran Ehmedî û Ridvan Ehmedî ku bira ne, birîndar bibûn.

Erselan Ehmedî zewicî bûye û keçeke wî ya 3 salî hebûye. Erselan herwiha kurê mamê herdu kolberên din bûye.

Rudaw