Asta ava Bendava Dûkanê bi awayekî metirsîdar daketiye û gihiştiye asta herî nizm a 60 salên dawî, ango ji dema çêkirina bendavê ve. Sedemên sereke yên vê karesatê, girtina avê ji aliyê Îranê ve û kêmbûna baranê ne.

Li gorî daneyên Rêveberiya Giştî ya Bendavan, di dîroka 60 salî ya bendavê de, ti carî rêjeya ava ku tê ser bendavê weke îsal kêm nebûye. Ji ber kêmbûna baranê, îsal tenê 240 mîlîmetre baran li herêmê bariye, û ev yek bûye sedem ku asta avê nêzîkî 20 metreyan dakeve û peravên bendavê bi awayekî berçav ziwa bibin.

Niha ji tevahiya şiyana bendavê ku 7 milyar sêcar e, tenê 1 milyar û 750 milyon sêcar av tê de maye. Ango, niha tenê %25ê avê di bendavê de maye û %75 kêm bûye.

Siyaseta Avê ya Îranê

Çavkaniyan destnîşan kirin, berdana avê ji aliyê Îranê ve bandoreke neyînî li ser bendavê dike. Îran avê bi awayekî birêkûpêk bernade; tenê dema ku tûrbînên wê yên hilberîna elektrîkê pêwîstî bi avê hebin, wê demê hinek avê berdide û paşê dîsa digire. Ev rêjeya kêm û ne birêkûpêk a avê nikare bandoreke erênî li ser bendaveke mezin wek Dûkanê bike.

Bandora li ser Gundiyan

Ev rewş rasterast bandorê li gundên derdorê dike, weke gundê 'Kêle Sipiyan' ku li ser Zêyê Biçûk e. Rûniştvanekî gund dibêje ku berê Îranê av bi awayekî demkî berdida, lê ji dema ku wan bendava xwe çêkiriye, av bi temamî hatiye girtin û ev yek jiyana wan zehmet kiriye.

Dîroka Bendavê

Çêkirina Bendava Dûkanê di sala 1954an de dest pê kir û di sala 1959an de bi dawî bû. Bendav li ser çemê Zêyê Biçûk li parêzgeha Silêmaniyê ye û weke yekem bendava li Iraqê tê hejmartin.

 

K24