Endamê Komîteya Pêwendiyên Derve ya ENKSê, Ibrahîm Biro ragihand, beşdarbûn an nebeşdarbûna PYDê di danûstandinên navdewletî de, ne girêdayî ENKSê ye, lê girêdayî helwestên PYDê bi xwe ye û tekez kir, ew ji aliyê civaka navdewletî ve nayên qebûlkirin.

Biro diyar kir, di heman demê de ku PYD hewlên xwe dide tevlî şandên danûstandinan ên opozisyonê bibe, danûstandin û rêkeftinên leşkerî digel hikûmeta Sûriyê û Rûsyayê îmze dike, ev yek jî ji aliyê civaka navdewletî ve nayê qebûlkirin.

Biro bal kişande ser hebûna wan di nava Îtîlafa Opozisyona Sûriyê de û got, rêkeftin digel Îtîlafê heye ku mafê gelê Kurd di paşeroja Sûriyê de parastî be.

Wî rayedarê ENKSê di derbarê lihevhatina ENKSê û Rêveberiya Xweser de jî destnîşan kir, ku serkirdeyên ENKSê li Rojavayê Kurdistanê hene, lê hejmarek ji wan jî li derve ne û got, gefa kuştinê li ser wan berdewam e.

Îbrahîm Biro diyar kir ku Rêveberiya Xweser mijara vekirina ofîsên ENKSê weke hikûmeta Sûriyê bi kar tîne û got, hikûmeta Sûriyê jî tenê behsa mijara nasnameyan dikir û bi vî awayî jî pirsgirêka Kurd piştguh dixist.

Rudaw