Bi piştevaniya Îdareya Kerkûkê zêdetir ji 400 malbatên çekdarên DAIŞê ji kampên Mûsilê bo Kerkûkê hatine veguhastin û li nava kampan de bicih bûne û hinceta anîna wan jî ew e, ku hevserên wan xelkê bajarokê Hewîce yê ser bi Kerkûkê ve ne.

Sê rêbendên hêzên Iraqî hene û rê nadin ti medyayekê derbasî nava kampa Leylanê ya Kerkûkê bibin, lê tîma Kurdistan24ê karî derbasî nava wê kampa bibe û hevdîtinekê bi hevjîna çekdarekî DAIŞê re bike.

Jina çekdarê DAIŞê dibêje: Ew malbatên çekdarê DAIŞê ji kampên Hemam El Elîl û Cedha yên Mûsilê bo kampa Leylanê tên anîn û her carê 150 malbatî tînin. Malbatên DAIŞê bi şevê û bi otombîlên mezin tînin kampê.

Destpêkê 150 malbatên DAIŞê hatine nava kampa Leylanê û piştre jî rêje zêde bûye û gihîştiye nêzîkî 400 malbat û ew hejmare jî bi berdewam zêde dibe.

Îdara Kerkûkê razî bûye ku jin û zarokên çekdarên DAIŞê bêne Kerkûkê û asankarî jî ji bo anîna wan kiriye. Endamên Encûmena Parêzgeha Kerkûkê ji v yekê ne razî ne û metirsiyên xwe nîşan didin.

Hikûmeta Iraqê rê daye ku malbatên DAIŞê vegerin cihên xwe, lê hêzên navçeyên Sunenişîn rê nadin ew jin û zarokên DAIŞê vegerin navçeyên, ji ber wê jî ew malbat li Kerkûkê tên bicihkirin.

K24