Li xaleke kontrolê li Mûsilê, hêzên Heşda Şebî û artêşa Iraqê êrîşî ser pasevanên Cîgirê Parêzgarê Neynewa û perlemantarekî Iraqê kirin.

Cîgirê Parêzgarê Neynewayê, Sîrwan Rojbeyanî ji Rûdawê re ragihand, li gel endamê Parlamentoya Iraqê Şêrwan Dûberdanî li ser riya vegera ji Mûsilê, li bazgeha Gogcelî, Heşda Şeibî û artêşa Iraqê otomobîla wan rawestandin û êrîşî ser pasevanên wan kirine.

Sîrwan Rojbeyanî diyar kir, ew yek bûye sedem ku şer û pevçûn di navbera pasevanên wan û Heşda Şeibî û hêzên artêşê de çêbibe.

Cîgirê Parêzgarê Neynewayê behsa wê yekê jî kir ku êrîş plankirî bû, ji ber ku nêzîkî 100 heta 150 çekdarên Heşdê û artêşê anîbûn wê xala kontrola rê.

Di derbarê heman bûyerê de, parlamenterê Iraqê Şêrwan Dûberdanî jî ji Rûdawê re got, ew dê doza yasayî li ser berpirsên Heşda Şeibî û artêşa Iraqê tomar bike.

Şêrwan Dûberdanî got, ji ber parlamenteriyê parêzbendiya wî heye û tekez kir, Sîrwan Rojbeyanî jî berpirsekî mezin ê hikûmeta xwecihî ye, lewma divê encamderên vî karî rûbirûyî yasa û dadgehê bêne kirin.

Wî parlamenterê Iraqê behsa wê yekê jî kir, ku di encama wê bûyerê de, 3 pasevanên Cîgirê Parêzgarê Neynewayê û pasevanekî wî birîndar bûne.

Parêzgeha Neynewa anko Mûsilê, ji sala 2014an ve ketibû destê çekdarên DAIŞê, lê hêzên Iraqê bi alîkariya Hêzên Pêşmerge yên Kurdistanê û Hevpeymaniya Navdewletî, piştî şerekî dijwar karîn wê parêzgehê û bajarê Mûsilê ji destê wê rêxistina tundrew derxînin.

Piştî ragihandina rizgariya Mûsilê ji aliyê hikûmeta Iraqê ve, kontrola wê parêzgehê ketiye destê Heşda Şeibî û hêzên artêşa Iraqê.

Rudaw