Ciwanekî xelkê wargeha Sîriyê ya ser bi bajarokê Şiladizê ya ser bi Amêdiya ser bi parêzgeha Duhokê, ji aliyê çekdarên PKKê ve du roj berî naha hatiye revandin û heta naha bêserûşûm e.

Ciwanê bi navê Şekîb Elî Rezgeyî roja 02.09.2019ê li sînorê bajarokê Şiladizê, ji aliyê çekdarên PKKê ve hatiye revandin û vê derbarê de Şukrî Elî birayê wî ciwanê hatiye revandin ji BasNewsê re ragehand: ‘’Du roj berî naha birayê min dema serdana navçeya Geliyê Balinde ya sînorê Şiladizê kir, ji aliyê çekdarên PKKê ve bi gule hatiye birîndar kirin û piştre jî hatiye revandin.’’

Herwaha got: ‘’Birayê min ti tewan û xeletiyek nekiriye. Ne li hember PKKê û ne jî li hember ti aliyekî din û du roje bi birîndarî ji aliyê çekdarên PKKê ve hatiye girtin û kesûkarên me serdana PKKê kirine, lê birayê min azad nekirine.’’

Navborî daxwaz ji aliyên peyvendîdar kirin ku hewl bidin bo azad kirina birayê wî û bi selametî wegerînin.

Derbarê bûyerê de rêveberê polîsê bajarokê Şêladizê Eşqî Mihemed ji BasNewsê re nûçe piştrast kir û got: ‘’Em agahdarê bûyerêne ku ciwanekî Şêladizê ji aliyê çekdarên PKKê ve hatiye birîndar kirin û piştre hatiye revandin lê ji aliyê kesûkarên wî ve bi fermî em nehatine agahdar kirin.’’

Herwaha got, ji ber ti dozek ji aliyê malbat û kesûkarên wî ciwanî ve nehatiye vekirin, polîsê navçeyê jî heta naha di pêdeçûnek li ser bûyerê nekirine.

Basnews