Ji ber operasyonên Tirkiyê yên li dijî PKKê, 15 gundên sînorê qezaya Zaxoyê li parêzgeha Duhokê ji nîştecihên wan vala bûne.

Xelkên wan gundên ser bi herdu bajarokên Derkar û Batîfayê yên qezaya Zaxoyê, ji ber operasyonên Tirkiyê û şerê navbera artêşa Tirkiyê û PKKê ji gundên xwe koçber bûne û çûne malên xizm û kesûkarên xwe.

Asayişa Zaxoyê û Rêvbeberiya Bajarokê Derkarê jî daxwaz ji xelkê wan gundan kirine, ku ji bo parastina jiyana xwe, mal û gundên xwe vala bikin û piştî bidawîhatina operasyonên Tirkiyê, vegerin cih û warê xwe.

Li navçeya Zaxoyê bi giştî 188 gund hene, ku ji ber şerê PKKê û Tirkiyê 98 gund hatine valakirin.

Xelkê deverê ji wê rewşa niha aciz in û dibêjin, Tirkiye bi hinceta PKKê, hêzên xwe di nav gundan de belav dike, li hember wê yekê jî gerîlayên PKKê li kêleka mal û nava rez û baxên xelkê wan gundna de baregehên xwe danîne.

Xelk dibêjin, herdu alî jî zirarê digihînin wan û jiyana sivîlan dixin metirsiyê.

Yek ji nîştecihên gundê Deştexê, yê bi navê Cemîl Oreha dibêje: “Ji ber şer û aloziyê, hemû çûn û em reviyan, beşek ji wan çûne derve û beşek din jî çûne Zaxo û Duhokê, em jî bi tenê mane.”

Li gor amareke qayimeqamiya Zaxoyê, li wê qezayê 187 gund hene, ku rêjeya %53 ji wan gundan ji ber şer û pevçûnên navbera PKKê û hêzên Tirkiyê, hatine valakirin.

Rudaw