Heta niha jî ti lihevkirinek di derbarê “navçeya aram” de çê nebûye, lê gengeşeyeke zêde di navbera Amerîka û Tirkiyê de heye.



Tirkiye daxwaz dike, kûrahiya “navçey aram” a li bakurê Sûriyê 30 km be, lê belê Amerîkayê herî dawî pêşniyara 5 heta 14 km xiste rojevê.



Li aliyekê din Hêzên Sûriyeya Demokratîk (HSD) û Rêveberiya Xweser a li Rojavayê Kurdistanê li dijî avakirina her core navçeyeke aram in ku Tirkiye kontrola wê bike.



Şanderê Taybet ê Amerîkayê yê bo Karûbarên Sûriyê, James Jeffrey pêr pênşemiyê li Waşingtonê di bersiva Rûdawê de gotibû, ew bi baş dibînin ku kûrahiya navçeya aram a li bakurê Sûriyê, di navbera 5 heta 14 kîlometran de be. Bi gotina Jeffrey, di dema avakirina navçeya aram de, dê çekên giran jî ji wê navçeyê bêne vekişandin.



Eger kurahiya “navçey aram” 14 kîlometir bin:



Wê Dêrik, Girkê Lekê û Rimêlanê, Tirbesipiyê, Qamişlo, Amûdê, Dirbêsiyê, Serêkaniyê, Girê Spî û Kobanî têkevin nav navçeya aram.



Piraniya bajarên Rojavayê Kurdistanê li ser sînor in, yanî sifir kîlometir ligel Bakurê Kurdistanê ne.



Eger “navçey aram” bi kurahiya 30 kîlometran be:



Li gel bajarên navborî dê Çil Axa û Til Remir jî bikevin nav “navçey aram”.



Lê dê Hesekê û bajarokên ser bi wê ve, yên weke Şedadê û Til Birak, li derveyî “navçey aram” bimînin, eger kurahiya wê 30 kîlometir bin.



Gotûbêjkirina navçeya aram di demekê ye, ku herêma Efrînê ku herêmeke sereke ya Rojavayê Kurdistanê ye, û herêmên bakurê Babê ku gelek gundên kurdan li wir hene, di bin kontrola gurûpên çekdar yên oposizyona Sûriyê û artêşa Turkiyê de ne, û Til Hasil û Til Eren jî di bin kontrola hikûmeta Sûriyê de ne û ew hemû ne di nava projeya navçeya aram de ne, loma me behsa wan li ser nexşeyê nekiriye.


Rudaw