Li bajarokên Ameda Bakurê Kurdistanê pîrozbahiyên Cejna Newrozê destpê kirIN.

Li navçeya Hezro ser bi parêzgeha Amedê ve 17ê Adara 2022ê, bi beşdarbûna parlamenterên HDP û DBPê, Cejna Newrozê bi slogana “Dem dema serkeftinê ye” li Qada Newrozê hat pîrozkirin.

Roja Pêncşembê 17ê Adara 2022ê, rêxistinên Partiya Demokratîk a Gelan (HDP) û Partiya Herêmên Demokratîk (DBP) li bajarokê Hezroyê agirê Newrozê pêxistin.

Ligel Hevserokê HDPê yê rêxistina Amedê Zeyat Ceylan û Parlamentera HDPê Remziye Tosun, hejmareke zêde ya xelkê wan bajarokan, beşdarî şahiya Newrozê bûn û li ber dahol û zirneyê govend gerandin.

Rêxistinên HDP û DBPê yên Amedê belavok li welatiyan belav kirin û daxwaz ji wan kirin, roja 21ê Adarê beşdarî şahiya mezin ya Newroza Amedê bibin.

Li Bakurê Kurdistanê û Tirkiyê çend roj e li çendîn bajarok û navçeyan ligel amadekariyên Newrozê, agirê Newrozê tê pêxistin.

Li Bakurê Kurdistan û Tirkiyê Newroz dê îsal dê li 62 navendan bê pîrozkirin. Dirûşma Newrozê `Dem Dema Serkeftinê ye` û ahenga yekem li Bêşebabê roja 15ê Adarê birêve çû û fînal jî li Amedê dibe.

Li gor bernameya hatiye belavkirin, ahengên Newrozê îsal dê bi dirûşma `Dem Dema Serkeftinê ye` 29 jê bajar li 62 navendan birêve biçin û rojeva sereke jî `Azadî Ji Bo Ocalan` e.

Li gor bernameyê, ahengên Newrozê yên li Wan û Stenbolê roja 20 Adarê birêve diçin û fînala Newroz îsal jî li Amedê tê kirin. 

Biryar e ji Başûr û Rojavayê Kurdistanê û welatên Ewropa û Rojhilata Navîn jî gelek kesayet, nûnerên partiyên siyasî û rêxistinên civaka sivîl bên vexwandin.

Komîsyona Ragihandina HDPê ya Stenbolê duh aşkere kir ku bo pîrozbahiya Newrozê li Stenbolê destûr hatiye dayîn û Newroz dê roja Yekşemê 20ê Adarê li Qada Yenikapi bê pîrozkirin.

 

Rudaw