Serokê Herêma Kurdistanê Nêçîrvan Barzanî êrişa şeva derbasbûyî ya li ser Hewlêrê bi tundî şermezar kir ku “bi şêweyekî tirsonek û hov, bêyî ti hincetek xelk, aramî û seqamgiriya Hewlêra paytext kir armanc.”

Serokê Herêma Kurdistanê dibêje, “Xweşbextane di êrîşê de ti ziyanên canî çênebûn. Em hevsozên welatiyên hêja yên Hewlêrê ne ku di bin nîgeranî û bendewariyê de demeke dijwar derbas kirin. Rûbirûbûna kêşe, gef û metirsiyan; pêkvejiyan, yekrêzî û bihevrekarkirina hemû alî û pêkhateyên Kurdistanê dixwaze.”

Nêçîrvan Barzanî tekez dike, “Armanckirina Hewlêrê bi vî awayî û dubarekirina wê, pêşhateke metirsîdar û binpêkirina eşkere ya ewlehî, aramî û serweriya Iraqê ye û jibilî alozkirina rewşê û ziyangihandina bi niha û pêşeroja tevahiya Iraqê, ti encameke din nîne.”

Serokê Herêma Kurdistanê daxwaz ji hikûmeta Iraqa federal û civaka navdewletî dike “ku bi awayekî cidî li ser van destdirêjiyan rawestin û hemû hewlên xwe bidin da ku zêdetir rê neyê dayîn bêrêzî bi serwerî û seqamgiriya welat û asayiş û aramiya hevwelatiyan bê kirin.”