Emîndarê giştî yê wezareta Pêşmerge Cebar Yawer, ji Kurdistan24ê re got: "Ji bo beşdarîkirina Kurdan di pêkanîna Hikûmeta nû ya Iraqa federal de, yek ji mercên şanda Herêma Kurdistanê li Bexda, vegera hêzên Pêşmerge ye ji bo navçeyên Kurdistanî wekî pêş bûyerên 16 Cotmeha sala derbasbûyî".

Cebar Yawer got jî: "Divê berî her tiştî rewşa navçeyên Kurdistanî bê aramkirin û wek berî 16 Cotmehê ew navçana ji aliyê Pêşmerge û hêzên Iraqî ve bihevbeşî bên parastin".

Derbarê pêwendî û hevkariya hêzên Hevpeymanan bi hêzên Pêşmerge re Cebar Yawer got: "Ti guhertin bi ser karên Pêşmerge û hêzên Hevpeymanan de li Kurdistanê nehatiye û her du hefteyan carekê civîneke hevbeş di nav herdu aliyan de heye, herwiha Hevpeymanan pirograma îsal ya rahênana hêzên Pêşmerge danîne û niha ew mijûlî bernameya sala 2019an ji bo rahênana hêzên Pêşmerge ne û alîkariyên wan jî ji bo hêzên Pêşmerge berdewam in".

K24