Rêveberê Cîbicîkar ê Rosneftê Igor Sechin ji Rûdawê re ragihand, ku ew gelek keyfxweş in ku Serokwezîrê Herêma Kurdistanê Nêçîrvan Barzanî li Rûsyayê ye û diyar kir, ku kar û xebatên wan bi Herêma Kurdistanê re gelek in û bi amajekirina bi projeyên hevbeş ên Rosneft û Herêma Kurdistanê tekezî li ser berdewamiya çalakiyên xwe li Kurdistanê kir.



Igor Sechin ku di merasîma 73mîn salvegera bîranîna Roja Niştimaniya Rûsya û serkevtina Rûsya bi ser Almanyaya Nazî di şerê cîhanî yê duyem de beşdar bûbû, ji Tora Medyayî ya Rûdawê re axivî û keyfxweşia xwe bi serdana Serokwezîrê Herêma Kurdistanê Nêçîrvan Barzanî bo Moskow nîşan da û amaje bi kar û çalakiyên Rosneftê li Kurdistanê kir.



Sechin diyar kir, ku kar û projeyên wan li Herêma Kurdistanê gelek in û ew dê li Kurdistanê kar li ser pêşxistina jêrxana herêmê bikin û gihandina berhemên enerjiyê bikin.



Rêveberê Cîbicîkar ê Rosneftê wiha axivî: “Em gelek, em gelek keyfxweş in ku îro Rêveberiya Kurdistana Iraqê hatiye li gel me wê cejnê pîroz dike. Kar pir gelek e, mijar li ser pêşxistina jêrxana wan navçêyan e û gihandina wan berheman e. Ji ber wê jî em dibînin gelek projêyên hevbeş hene, yên ku em dê bi hev re pêş bixin û li ser kar bikin. Ci bi Kurdistamê re be û çi bi Iraqî re be, ji ber wê jî kar pir gelek e û em dê kar bikin.”



Serokwezîrê Herêma Kurdistanê bi vexwandineke fermî ji doh Sêşemî 8ê Gulanê serdana Rûsyayê kiriye û îro beşdarî merasîma 73mîn salvegera serkevtina Rûsya bi ser Almanyaya Nazî di şerê cîhanî yê duyem de li Qada Sor a Moskowê kir.

Rudaw