Nêçîrvan Barzanî serokwezîrê herêma Kurdistanê, roja pêncşemiyê 15.10.2015ê li bajarê Hewlêrê, pêşwazî li Anîka Moln Helgren sefîra nû ya Swêdê li Îraqê û şandeya diplomasiya bi wê re kir û di civînekeê de Helgren kêfxweşiya xwe li hember serdana bo herêma Kurdistanê û ew têkeliyên diplomasî yên saxlem û xurt digel Îraqê û bi taybetî digel herêma Kurdistanê hene nîşan da û hêvî kir ku ew têkelî berdewam bibin.

Rewşa Îraqê û herêma Kudistanê hat nirxandin û sefîra Swêdê tekîd kir ku welatê wê giringiyeke mezin bi warê civakî, aborî, parastina mafê mirovî û berhingarbûna şideta dijî jinan dide û ew pêngavên hikûmeta herêma Kurdistanê di wan waran de avêtine bilind nirxandin.
Sefîra nû ya Swêdê daxwaz kir ku hemû arîşe û pirsgirêk bi dansûtandin û diyalogê bên çareser kirin û ew aramiya li herêma Kurdistanê heye berdewam be û bila hemû alî rûbirûyê terorîstên DAÎŞ bibin. Wê got ku di demên bê de hijmareke şandeyên hikûmeta Swêdê dê serdana herêma Kurdistanê bikin û ji bona zêdetir gotûbêjkirina hemû pirsan digel berpirsên herêma Kurdistanê bicivin.

Nêçîrvan Barzanî sipasiya serdana sefîra Swêdê bo herêma Kurdistanê kir û hêviya serkeftinê ji wê re xwest û piştevaniya xwe ji bo pêşniyarên wê yên di warê pêşdebirina rewşa civakî û zêdetir bidemokrasîkirina civakê û xebatên zêdetir ji bona nehêlana şideta dijî jinan nîşan da.

Serokwezîr sipasiya hevkarî û hevahengiya berê ya hikûmeta Swêdê bo herêma Kurdistanê kirî ku, di warê derxistina çend qanûnan de û bi taybetî derxistina qanûna rûbirûbûna şideta li dijî jinan fêdeyeke mezin jê dîtiye, kir.

Rewşa siyasiya herêma Kurdistanê, garantîkirina pêdawîstiyên hevwelatiyan, çareserkirina pirsgirêkan bi rêya diyalogê û reşa kurdên Swêdê dijîn hin mijarên din yên civînê bûn.