Di projeqanûna bûdceya 2016ê ya Iraqê de, dîsa behsa rêkeftina di navbera Herêma Kurdistanê û Bexdayê hatiye kirin û li ser wê bingehê 14 trilyon dînar (11,6 milyar dolar) bo Kurdistanê hatiye diyarkirin.

Birîkarê Wezareta Darayî ya Hikûmeta Iraqê Fazil Nebî ji Rûdawê re ragihand: “Di projeqanûna bûdceya 2016an a Iraqê de, bi heman awayê par, behsa rêkeftina firoştina petrola Herêma Kurdistanê ji aliyê şîrketa Somo ya Iraqî ve hat kirin û para Hewlêrê ji bûdceya Iraqê hat diyarkirin.”

Fazil Nebî wiha got: “Ji ber ku rêkeftina Hewlêr û Bexdayê nehatiye nûkirin û nehatiye hilwişandin jî, lewma ji bo diyarkirina bûdceya Kurdistanê dê pişt bi rêkeftina berê bê girêdan, ku li gorî wê nêzîkî 11 milyar û 600 milyon dolar hatiye danîn.”

Hewlêr û Bexda lihev kiribûn ku, Herêma Kurdistanê rojane 550 hezar bermîl petrol bide Bexdayê, Bexda jî % 17 ji bûdceya Iraqê ji Kurdistanê re bişîne.

Ji ber neşandina pereyan ji aliyê Bexdayê ve, Herêma Kurdistanê biryar da ku serbixwe petrola xwe bifroşe.

Nebî wiha domand: “Di projeqanûna budceya 2016 de, firotina her bermîlekê bi 45 dolaran hatiye texmînkirin, herwiha bûdceya Iraqê jî bi 113 trilyon û 500 milyar dînar hatiye texmîkirin.”

Beriya ku ew proje bo Parlamentoya Iraqê bê şandin, niha dê li Encumena Wezîran a Iraqê gotûbêj li ser were kirin.

Rudaw