Çavkaniyeke cihê baweriyê ji BasNewsê re eşkere kir ku hemû aliyên siyasî li ser pêkanîna hikûmetê lihev kirine lê tenê hinek pirsên normal mane û ew jî tên çareser kirin.

Heman çavkaniyê got: ‘’Berî hilbijartinê kabîneya heştem a hikûmeta Herêma Kurdistanê tê ragehandin, ku niha di qonaxa dawî de ye.’‘ Zêdeyî 6 meh dibe heta niha aliyên siyasî yên Kurdistanê nikarîne kabîneya heştem a hikûmeta Herêma Kurdistanê pêk bînin û ew çavkaniya cihê baweriyê jî dibêje: ’‘Hikûmeta ku dê were ragehandin koalîsyon û bi beşdariya hemû aliyan dibe.’‘

Derbarê heman mijarê de Mamostayê Zanistên Siyasî yê Zanîngeha Silêmaniyê Dr. Rêbwar Kerîm jî bo BasNewsê wiha axifî: ‘’Hevwelatî bi pêkanîna hikûmeteke koalîsyon zerarmend dibin, lê ji bo qonaxa niha ya Herêma Kurdistanê hikûmeteke wiha baştir e ji ya piranî, jiber egera wê yekê heye di hikûmeta piranî de ew aliyên ku li derveyê hikûmetê dimînin raya giştî bixin tevgerê û pirsgirêkan ji hikûmetê re çêbikin, evna jî zêdetir zerarê dighîne hevwelatiyên Herêma Kurdistanê.’‘

Kerîm axaftina xwe wiha qedand: ‘’Eger heye ku berî hilbijartinê hikûmet neyê ragehandin û aliyên siyasî berê xwe bidin hikûmeta piranî, ji ber ev rewşa niha eger her wiha bimîne û aliyên siyasî li ser pêkanîna hikûmetê lihev nekin û alî li ser postên hikûmetê negihin rêkeftinê, wê demê rêkeftina çend aliyan bo pêkanîna hikûmetê asantir e û dibe di demeke kurt de were pêkanîn.’‘

Basnews