Serokê Herêma Kurdistanê Mesûd Barzanî îro li Selahedîn ligel nûnerên Kurd ên li Bexdayê dicive û tê çaverêkirin ku li ser budceya 2014 ya İraqê yekhelwêstî were ragehandin.

Di vê derbarê de parlamenterê Fraksyona Hevpeymanya Kurdistanê (Komela Îslamî) Şêx Fatîh Daroxayî ji BasNewsê re got: ‘’Di civîna îro ya ligel Serokê Herêma Kurdistanê de emê gotûbêjê li ser yekhelwêstiya beramber budceya 2014 ya İraqê bikin. Sibe xwendine yakem ji bo wê proje-yasayê li Parlamentoya İraqê tê kirin, loma yekhelwêstiya Kurdan pir girîng e.’‘

Li gor agahiyên BasNewsê, di civînê de behsa gelek pirsgirên di navbera Hewlêr û Bexdayê de tê kirin, herwiha serkirdayetiya Kurd û nûnerên Kurd bi yekdengî xwe ji bo pirsên Herêma Kurdistanê li beramber Bexdayê amade dikin.

Ji aliyekî din ve Serokwezîrê Herêma Kurdistanê Nêçîrvan Barzanî her îro serdana Tirkiyê kir û beşek ji mijarên serdana Barzanî bi hinardekirina petrola Herêma Kurdistanê ve girêdayî ye ku ji Tirkiyê dê bo bazarên cîhanê bê şandin.

basnews