‘Bexda dixwaze rewşa Kurdistanê aloz bike’
Endama Parlamentoya İraqê ser bi Hevpeymaniya Kurdistanê Eşwaq Caf ragehand ku hikûmeta İraqê bi hincetên bê bingeh meaşê parêzgehên Kurdistanê naşîne û wiha axifî: ‘’Hincetên Bexdayê gelekî bê bingeh in, ji ber evna ne dosya petrol û gumriyê ye heta lêkolîn li ser meaşê parêzgehên herêmê bên kirin, lê mebesta wê têkdana rewşa aram a Herêma Kurdistanê ye.’‘
Caf, diyar kir ku neşandina meaşê fermanberên hemû parêzgehên İraqê bê cudahî ji aliyê hikûmeta İraqê ve hîç mantiqek têde nîne û wiha pêde çû: ‘’Ji ber evna mafekî xwezayî yê wan e û çênabe kes bi rewşa aborî ya malbat ê ferdên vî welatê bileyize.’‘
Di daxwiyaniyekê de bo BasNewsê, Eşwaq Caf da zanîn ku neşandina meaşê fermanberên Herêma Kurdistanê hinceteke siyasî ye ji dêlva ku yasayî be û got: ‘’Ji ber ku hikûmeta Bexdayê di meseleya dosya ewlekarî û xizmetguzariyê de şikestiye û serkeftî nebûye niha dixwaze vê şikesta bi neşandina meaşê fermanberên herêmê veşêrê û fermanberan ji hikûmeta Kurdistanê nîgeran bike, wate dixwaze rewşa herêmê aloz bike.’‘
Caf axaftina xwe wiha qedand: ‘’Em îro li benda biryara Encûmena Wezîrên İraqê ne ya derbarê şandina meaşê fermanberên Herêma Kurdistanê de, eger biryar negatîf bû wê demê em ê wek parlamenterên Kurd li Bexdayê helwêsta xwe pêşan bidin, ji ber çênabe parlamenterên Kurd meaşê xwe werbigirin û fermanberên Herêma Kurdistanê bê meaş bin.’‘
Basnews
