Li parêzgehên Rojhilatê Kurdistanê her diçe rêjeya bêkariyê zêde dibe û şêniyên wan bajaran jî vêna bi xemsariya rayedarên Komara Îslamî ya Îranê ve girêdidin ku derfeta kar ji wan re naxulqînin.

Di vê derbarê de Rêveberê Giştî yê Teawin, Kar û Refaha Civakî ragehand ku li parêzgeha Urmiyê zêdeyî 117 hezar kes bêkar in. Di sala 2011’ê de rêjeya bêkariyê li parêzgeha Urmiye û Bokan di asta herî bilind de bû û Şino jî di asta herî kêm a bêkariyê de bû.

Li gor agahiyên ku medya Îranê belav kirine, li Îranê parêzgeha Sine ya Rojhilatê Kurdistanê di rêza sêyem de ye û li wî bajarî rêjeya bêkariyê ji sedi 28 e. Li Ciwanroya parêzgeha Kirmanşan di demsala behar û havîna borî de rêjeya bêkariyê ji sedî 46.9 bûye û di nav hemû bajarên Îranê de di rêza duyem de ye.

Li parêzgeha Urmiyê jî rêjeya bêkariyê ji sedî 30.6, Serpêla Zehaw ji sedî 30.4 û Pawe ji sedî 30.2 ye. Li gor şêniyên wan bajaran hikûmeta Îranê sedema bêkariyê ye ji ber ku xemsar e û derfeta kar ji wan re naxulqîne.

Basnews