Rojnameyên Tirkiyê di hevdîtina Serokê Herêma Kurdistanê Mesûd Barzanî û Serokwezîrê Tirkiyê Receb Tayib Erdogan, û li gel hunermend navdar Şivan Perwer û Îbrahîm Tatlises li bajarê Amedê, gelek rênimayên berê derbas kirin, û wek ew hevdîtin û şahî di dîroka Tirkiyê de gavekî gelekî li pêş bû.

Rojnameya Akşam bi manşetekî mezin nivîsî “Megrî amed”, Akşam pêde diçe û dibêje, Erdogan got “Êdî ji vir û pêde li Tirkiyê cudatî û înkarkirin nîne û em bi herve ber bi Tirkiyeke nû diçin ku li dewsa zistanê wê bihareke têr gul û rengîn çêbibe”.

rojnameya Posta jî bi xeteke pan nivîsî “Bijî Aşitî û Biratî” û têda nivîsandiye ku li Amedê rojên dîrokî hatin jiyankirin, Serokê Herêma Kurdistanê piştî 21 salan û Şivan perwer piştî 37 salan serdana Kurdistana Bakur kirin û Erdogan piştî 11 salan serdana Şaredariya Amedê kir û cara yekê ye ku rayedarekî Tirkiyê wek Serokwezîr navê Kurdistanê dibêje û diruşmên “Bijî aşitî û biratî” li cihekî weha fermî tê avêtin.

Herwiha rojnameya Yenîçax jî manşêta xwe bi “Yaşasin Kurdistan” wate “bijî Kurdistan” danî û tîne ziman ku “Barzanî bi şaşika Sor û cil û bergên kurdî û li nav gel jî alên Kurdistanê û Tirkiyê bi hevre dihatin hejandin û gelê li wir amade jî diruşmên bi kurdî diavêtin.

Rojnameya Yenî Şefeq jî manşêta xwe wiha danî: “Amed duh bi rastî cejneke biratiyê jiyan kir û dîwarên berê hatin ruxandin. Cara yekê ye ku Serokê Herêma Kurdistanê bi kurdî û tirkî nameya bijî aştî û bijî biratiya Kurd û Tirkan û bijî azadî li nav Tirkiyê li Amedê dibêje”.

Piraniya rojnameyên Tirkiyê bi taybet li ser helwest, gotin û kiryarên nû rawestiyan, wek gotina Kurdistanê ku Erdogan bilêv kiriye û hatina Şivan Perwer û axaftinên Serokê Herêma Kurdistanê Mesûd Barzanî ku bi zimanê kurdî bû û dîsa diruşmên bijî Kurdistan û bijî Serok Mesûd de rawestiyan.

Rudaw