Serokê parlamentoya Kurdistanê Erselan Bayîz, diyar kir ku serokê tevgera Gorran Newşîrwan Mistefa jê re gotiye “eger serokê Herêmê ji aliyê parlamentoyê ve were hilbijartin ez razî me Barzanî heta 4 salên din jî wek serokê Herêma Kurdistanê bimîne.”

Serokê parlamentoya Kurdistanê Erselan Bayîz, îro (01.07.2013) ji televîzyona Gelî Kurdistan re ragihand ku beriya pesendkirina pêşniyara dirêjkirina heyama karê serokê Herêma Kurdistan û parlamentoyê, digel serokê tevgera Gorran Newşîrwan Mistefa û serokê komela îslamî ya Kurdisanê Elî Bapîr li ser destûr û hilbijartinên serokatiya Herêma Kurdistanê û parlamentoyê civiyaye.

Bayîz da zanîn, di civîna digel Newşîrwan Mistefa de jê re wiha gotiye: “Eger serokê Herêma Kurdistanê ji aliyê parlamentoyê ve were hilbijartin ez razî me Barzanî heta 4 salên din jî wek serok bimîne.”

Serokê parlamentoya Kurdistanê ragihand ku dirêjkirina heyama karê serokê Herêma Kurdistan û parlamentoyê jî ji bo nehîştina valahiya yasayî ye û got, hilbijartinên parlamentoya Kurdistanê dê di dema xwe de were sazkirin.

Tê zanîn, hilbijartinên parlamento û encumenên parêzgehên Herêma Kurdistanê 21ê Îlona îsal tê sazkirin.

Lê hilbijartinên serokatiya Herêma Kurdistanê ji ber dirêjkirina heyama karê serokê Herêma Kurdistanê, hat paşxistin.

Rudaw